IS CASILAAD GUUR!!

“Xaasku ma halkanuu daganyahay?” saxiib aan haduun isbaranay ayaa I waydiiyay, mareeyaha hay’adayada, dhalinta kaftan wadaagta aan nahay, ilaa mudalabka cunada iisoo dhiga iyo qaar kale oo badana midba si ayuu ii waydiiyaa, hablahana indhahooga ayaan ka milicsadaa rumaysi la’aanta, markaan ugu jawaabo “Maya! Wali walaal ma aanan guursan”. Intaas waxa ii dheer ehel iyo qarabo, midka ay dani isku kaayo keento iyo ka kadisku na kulmiyaba si googto ah ayuu ii yidhaa “Cabdulaahi waa Goorma?!”, hadaanay I odhanba “ma gabadhbaan kuu doonaa?”. Warkaasi waxa uu cirka isku sii shareeraa ayaanta rafiiqyaday mid liiska guurdoonka ka baxo, ka qalinjabiyo akadmiyada haasaawaha oo qalinka ku duugo aadame ay isdoorteen.

Read More »

Advertisements

Bare Barre

Favim.com-alone-art-cute-guitar-love-music-90029

     Barre waxa aad tahay bare ku takhasusay barbaarinta ubadka, dugsiga aad u shaqo tagto wuu buux-dhaafaa, magac iyo sumcadna wuu ku wadhwadhaa, adna waad u hagar-baxdaa waxbarista ubadkaad aad baraha u tahay iyo barbaarintoodaba, waalidku adi mooyee bareyaasha kale maba yaqaanaan, ubadkuna magacaaga way ku hadaaqaan dugsiga dhexdiisa iyo dibadiisaba, magaalka markaad ubaxdo umadda ayaa kuu jeeb ah, ardaygaagii kaalinta koobaad galay sanadkii la soo dhaafay waalidkii waaka haysta maqaayada wax laga cuno, maalinkaa ka dib lacag aad bixiso waakii ka dhaartay, adna hadii uu xishoodku ku dhaafin lahaa waakii ku xujeeyay ee Eebbe wayne kugu xawilay hadiiba aad garab marto, baska laftiisa waaka wada galinka danbe mid ardaydaada ka mid ahi, hadaanu ku qaadin oo aanu meesha aad u socoto ku hordhigin maalinkiisu  miyaabu dhamaystirmaa?!

Qiyaastii malaha baalashka oo kaliya ayaad lagactaada ka bixisaa inta aad magaalka joogto.

Read More »

Kacaanka Jira: Ama Muxuu Aadamuhu U Socdaa Isagoo Adhax Taagan

the-upright-revolution-4

Waxa loo soo minguuriyay Af Somali, laguna faafiyay jalada.org

Khaloudy Mohamed Sa’eed and Abdillahi Raage “Sayyidka”

Wakhtiyadii hore aadamuhu waxa uu ku socon jiray afarta addin, sida dhamaan san-ku-neeflaha kale ee afar-dinlayaasha ah. Aadamuhu waa uu ka dheerayn jiray bakaylaha, shabeelka iyo jeerta. Labadiisa lugood iyo labadiisa gamcood aad ayay iska xigeen dhamaan xubnihiisa kale, laablaabatooyinkooduna waa isku ekaayen oo isku dhigmayeen, garbahu waxa ay ku beegnayeen miskaha, suxuladuna jilabaha, mataanuhuna kuraamaha, caguhuna gacmaha. Midwalbaana waxa ay ku gabagaboobaysay shan farood oo cidiyo huwan. Gacmaha iyo luguhu waxa ay aad iskaga eekaayeen faraha shanta ah qayb-qaybtankooda, suulka iyo fardhexeda ilaa faryarada lugta iyo suulkeeda. Lugaha iyo gacmuhuna waxay iskugu yeedhi jireen inaadeer.

Read More »

Ismoogaan….!!!! (2)

zayidka
C.Lahi Raage “Sayyidka”

     Jidcade boodh badan, xilli qoraxdu wixii dhaqaaqayaba dubanayso adigoo daal iyo caajis kaa muuqdo, labiskaagana aanad u soo aabo yeelinba markaad soo baxaysay, dhankan aad u socotana aan garanayn, xagaad ka timidna illaabay, meel aad ku maqnaydna aan xasuusnayn ka hor intaanad ku baraarugin baabuurka cad ee Indhacadaha ah ee gabadha cad ee indhaha cad wadato oo kugu soo maqan.!!!

     Sida xaragada leh ee ay birta u wadato iyo qosolkaas kuu sheegaaya in kaftan daba socdo waa kuwa ku dareensiiyay in gashaantididu adi kugu soo dakhrantahay…!!!!

     Waatuma tollow?, ayay kuu garanaysaaa?, malaha cidbay kugu qaldaysaa? Waadiga waydiin isla booday ee kunoqday meeshii aad ku maqnayd ee aanad aslanba garanayn, Isasoona hordhigtay buugii dhamaan intaad gabadh taqaanay ku duugnayd, baalbaal markaad u rogtay adoo rumaysan la’ in aad ka wayday waadiga u wareegay liiskii wixii gabadh lagu sheegay in ay ku hadal haysay wakhtiyadan danbe. Labada midna ka wayday.!! Waaba Yaaab..!!

     Adoo taa layaaban waadiga maqlay qosolka qof ka danbeeyay oo la saran birta, codkaasi waaka kugu soo celiyay dunida waaqaca aad joogtay amintaas, isla markiiba waadiga ku talamay yeelkeed cida ay tahaye si diiran u soo dhawee oo is-giiji. Halmar ood is eegtay waata niyada kaa dishay, labiskaaga isdhexyaalka ah, kabahaaga boodhku midbeeyay, timahaagan aad moodo in qunaqabatayn lagu soo rogay, wax aad isku giijisaaba kuuma hadhin, wakhtiguna kuma gacan qabanayoo madow iyo xili aan wax la arkayn maaha. Tola’ay..!!!

     Wax aad talantaba taayirka kusoo gaadhay waaka kuu diiday in aad sii wadato, dhabtiiba waa timid, halkii lagu kala bixi laha ayaa la joogaaye miyaad kaga horaysaa istidhi? Maya iyadu hakaaga horayso go’amisay.

    Iyadba way ku jeedaa in aad yaabantahay oo aad iswaydiinayso waydiimo ayada ku sahabsan oo jawaab u la’dahay, si ay kaagu raaxayso culayska waydiimahaas, wareerka war la’aantana kaaga saarto, iyada oo hadalkeeda qosol kala googaynaayo, gacameheeda midi ku maqantahay qofka la fadhiya mida kalena markay isteerinka ka qaaday waata kuugu soo fidisay mobile sawir fiican waata ku tidhi “Walaal sawir xasuus ah ani iyo xaajigayga ma naga qaadi adoo mahadsan”.!!!

C.Laahi Raage “Sayidka”

Qalinle, MuqaalQaade, Iyo Warfidiyeen Soomaaliyeed.

Ismoogaan..!!! (1)

  646x404
Waligaaba xili xunbaad socon jirtay, Waxa halkaa ka madmadoobi waa maxay tolow? Afar dumara oo afka xidhan weeyi, Xiligan iyagna maxaa dhigay dariiqan baas ee madawga abdan.??
-Afkaaba la is galiyay, deetana inta gacmaha la isqabsaday dhankayga loo soo dhaqaaq.!!!!!
Malaha anaaba la igu soo socdaa??!!, Oo maxaa lagu waydin eed galabsatay?,
Imisaad dumarbaa wax shirqoolay maqashay, oo ninbay iskugu tageen oo dileen lagu yidhi, way dhacdaaye.
Horta maxaad godob leedhay? Waxaba, hadaa maxaa iga cabsiinaaya? garan maayo.
-La isoo gaadh anoo sidaa waalan hoosta uga shekaysanaaya, Bisinka wuxu guux badanaa,??!!!
“Naa ha jees-jeesanina inaad baqaysaan yaan la idinka dareemine” ayaaan maqlay.
Qosol iyo yaab ayaa mar qudha igu soo wada dagay.!!!!
Markaasaan idhi “Maxaan ku mooday mise waxaad noqotay.??!!”
Ileen midkeenba dhankiisuu u baqaayay.
C.laahi Raage “Sayyidka”
Curiye SheekoFaneed Soomaaliyeed

DAYRKA CAMUUD CABIRKIISA..!!!!

4-2014_1399125742_308

   Cabdow waxa uu ahaa wiil dhalinyar ah, waxbarashadana ayna aad iskugu fiicnayn,wakhtigiisa inta badan waxa uu ku qaadan jiray kubad, qayil iyo haasaawe, nolosha hadaf  la sheego kamuusan lahayn, waalidkiisana waxa uu u arki jiray inay culays ku yihiin, marwalba oo ay ku cadaadiyaan in uu dhaqankiisa toosiyo ama wax-barashadiisa hagaajiyo waxa uu ku fikiri-jiray in u ka guuro, lakiin waxa hortaalay caqabad ah waxa uu ku noolaan lahaa hadii qoyskiisa ka dhex-baxo, taasina waxa ay ku khasbijirtay in uu labo nololood noolaado, nolol uu qoyskiisa la nool yahay oo ben ku dhisan iyo nolol uu goni u noolyahay o waxa uu doono sameeyo.

Read More »